Bu iki dövlət Xəzər dənizinə çıxışı olan nəqliyyat dəhlizi yaradacaq

Türkmənistan və Tacikistan Xəzər dənizinə çıxışı olan nəqliyyat dəhlizi yaratmağı planlaşdırır.
reportyor.tv xəbər verir ki, Türkmənistan Tacikistanla birlikdə iki dövləti Xəzər dənizinə birləşdirən nəqliyyat dəhlizi yaratmağa hazırdır. Məlumata görə, bunu Türkmənistan prezidenti Sərdar Berdiməhəmmədov Düşənbədə Tacikistanın rəhbəri Emoməli Rəhmonla danışıqları zamanı deyib.
Xəbərdə vurğulanır ki, nəqliyyat sahəsində əməkdaşlıq Aşqabad və Düşənbə arasında münasibətlərin qeyd-şərtsiz prioritetidir. Hər iki dövlətin səyləri əsas məqsədə, yəni Asiya, Avropa və Yaxın Şərqin nəqliyyat sistemlərinin birləşməsini təmin edən güclü və müasir infrastrukturun yaradılmasına nail olmağa yönəlməlidir.
Türkmənistan rəhbərinin fikrincə, Dünya Okeanına birbaşa çıxışı olmayan Mərkəzi Asiya dövlətləri dünya bazarlarına çıxmaq üçün Şərqi Xəzərin liman infrastrukturunun imkanlarından maksimum istifadə etməlidirlər. Berdiməhəmmədov deyib ki, onun ölkəsi Türkmənistanın Türkmənbaşı dəniz limanından Tacikistanın maraqları naminə sərfəli şərtlərlə istifadəni müzakirə etməyə hazırdır.
Həmçinin, Berdiməhəmmədovun sözlərinə görə, Aşqabad və Düşənbə Şərq-Qərb xətti boyunca nəqliyyat, tranzit və logistika əməkdaşlığı üçün strateji qovşağın formalaşdırılması səylərini əlaqələndirmək və regional və qlobal platformalarda, ixtisaslaşmış beynəlxalq təşkilatlarda, maliyyə institutlarında potensial tərəfdaşlarla işləmək niyyətindədirlər.
Berdiməhəmmədovun Tacikistana səfəri zamanı yükdaşımaların daha da artırılması və daşımaların intensivləşdirilməsi üçün birgə tədbirlər proqramı təsdiq edilib.