Vaşinqtondan Ankaraya gözlənilməz jest: Tramp Türkiyə üçün bu addımı atır

ABŞ prezidenti Donald Tramp Senatda Türkiyəyə qarşı tətbiq edilən CAATSA sanksiyalarının ləğvi ilə bağlı prosesin başladılmasına təşəbbüs göstərib.

Musavat.com xəbər verir ki, məsələ yanvar ayında – Milad bayramından sonra Senatın gündəliyində yekun müzakirəyə çıxarıla bilər.

Proses uğurla başa çatarsa, Türkiyə ABŞ silah bazarına qoyulan bütün məhdudiyyətlərdən azad olunacaq və Amerika istehsalı olan silah-sursat və hərbi texnikanı maneəsiz şəkildə əldə etmək imkanı qazanacaq. Bu addım Vaşinqton–Ankara münasibətlərində uzun müddətdir davam edən gərginliyin yumşaldılması kimi qiymətləndirilir.

Xatırladaq ki, CAATSA sanksiyaları Türkiyənin Rusiyadan S-400 hava hücumundan müdafiə sistemləri almasına cavab olaraq tətbiq edilmiş, Ankara bu səbəbdən F-35 proqramından kənarlaşdırılmışdı. İndi isə Tramp administrasiyasının bu təşəbbüsü ABŞ-ın Türkiyəni yenidən strateji hərbi tərəfdaş kimi görmək istədiyini göstərən açıq siqnal sayılır.

Mümkün qərar təkcə ABŞ–Türkiyə münasibətlərinə deyil, həm də NATO daxilində balanslara və regionda hərbi-siyasi proseslərə ciddi təsir göstərə bilər.

Musavat.com