Rusiya qazı İrana gəlir: 3 illik böyük layihənin detalları məlum oldu!

İran və Rusiya arasında enerji sahəsində strateji əməkdaşlıq yeni müstəviyə keçir. İranın Moskvadakı səfiri Kazım Cəlali bəyan edib ki, hazırda Rusiya qazının İslam Respublikasına tədarükü ilə bağlı irimiqyaslı müqavilə hazırlanır.

Reportyor.tv xəbər verir ki, səfir fevralın 13-də jurnalistlərə açıqlamasında layihənin qarşısında heç bir siyasi maneənin qalmadığını vurğulayıb.

Cəlali danışıqların artıq yekun mərhələdə olduğunu bildirib:

"İran tərəfi üçün heç bir problem yoxdur. Rusiya Federasiyasının yüksək rütbəli rəsmiləri ilə bütün zəruri müzakirələri aparmışıq. Müqavilə imzalanan kimi layihənin icrasına dərhal start veriləcək".

2-3 il vaxt lazım olacaq

Səfir qeyd edib ki, saziş imzalansa da, qazın genişmiqyaslı axını üçün müəyyən texniki hazırlıqlar tələb olunur. Xüsusilə yeni boru kəmərlərinin inşası və mövcud infrastrukturun modernləşdirilməsi üçün 2-3 il vaxt lazım gələcək.

Layihənin strateji hədəfləri:

Həcm: Rusiya Energetika Nazirliyinin daha əvvəlki proqnozlarına görə, illik tədarük həcminin 55 milyard kubmetrə çatdırılması planlaşdırılır (bu, vaxtilə Avropaya gedən "Şimal Axını-1" kəmərinin gücünə bərabərdir).

Marşrut: Qazın əsasən Azərbaycan ərazisindən keçən mövcud infrastruktur və Xəzər dənizi marşrutu ilə çatdırılması nəzərdə tutulur.

İranın planı: Tehran Rusiya qazını idxal etməklə həm daxili ehtiyaclarını (xüsusən şimal bölgələrində) ödəməyi, həm də bu qazı qonşu ölkələrə (Pakistan, Türkiyə, İraq) təkrar ixrac edərək regionun "qaz qovşağına" (hub) çevrilməyi hədəfləyir.

Xatırladaq ki, hələ 2025-ci ilin sonunda Azərbaycan üzərindən kiçik həcmli (illik 1.8 mlrd kubmetr) "swap" tədarükləri üçün infrastrukturun hazır olduğu bildirilmişdi. Yeni hazırlanan müqavilə isə bu əməkdaşlığı tamamilə fərqli, strateji miqyasa daşıyacaq.

Musavat.com