Xankəndidən İrəvana uzanan “casusluq hekayəsi” - Sarkis əslində kimin adamıdır?

Ermənilərin Qarabağdan çıxmasından sonra Xankəndidə qalan Sarkis Qalstyan 7 ay sonra Ermənistana qayıtdıqdan sonra casusluq ittihamı ilə həbs olunub. Ona qarşı sürülən bu ittiham, ümumiyyətlə Xankəndidə nə işlə məşğul olması, Azərbaycanın, yoxsa Ermənistanın maraqlarına uyğun fəaliyyət göstərməsi ətrafında müəmma davam edir.

Xankəndidən İrəvana uzanan “casusluq hekayəsi” adlandıra biləcəyimiz bu prosesdə gizli məqamlar çoxdur.

Publika.az xəbər verir ki, Qalstyan martın 29-da Ermənistana qayıdıb, martın 30-da Azərbaycanın xeyrinə casusluq ittihamı ilə həbs edilib.

Ermənistan tərəfi Qalstyanın Xankəndidə Azərbaycan xüsusi xidmət orqanları tərəfindən “ələ alındığını” hesab edir. Ermənistan mediasında isə Qalstyanın Xankəndinin komendatı olacağına dair əsassız iddialar irəli sürülürdü. O, birinci Qarabağ müharibəsində Azərbaycan torpaqlarının işğal edilməsində iştirak edib. Qarabağdakı qondarma rejimin “xüsusi xidmət orqanlarında” işləyib, Şuşada qondarma inzibati ərazi dairəsinin rəis müavini olub. Sonuncu dəfə isə qondarma rejimin “təhsil nazirliyində” çalışıb. Ermənilər Qarabağı tərk etdikdən sonra Qalstyanın niyə Xankəndidə qalması şübələrlə doludur.