Tramp ABŞ silahlarının Avropa və Ukraynada istehsalına icazə verəcək

ABŞ prezidenti Donald Tramp Amerika müdafiə şirkətlərindən Avropa və Ukraynada lisenziya əsasında silah istehsalını yoluna qoymağı xahiş etməyi planlaşdırır.

Reportyor.tv xəbər verir ki, məlumatı Bloomberg Agentliyi yayıb.

Qeyd edilir ki, Ukraynanın hava hücumundan müdafiə sistemlərinə, xüsusən də Rusiya ballistik raketlərini vurmaq üçün tutucu raketlərə ehtiyacı var.

Lakin problem ondadır ki, bu cür raketləri yalnız ABŞ istehsal edə bilər. ABŞ-ın İrandakı əməliyyatı ehtiyatlarını tükəndirdiyini və onları doldurmaq üçün vaxt lazım olacağını nəzərə alaraq Tramp G7-dəki müttəfiqlərinə lisenziyaların verilməsini nəzərdən keçirəcəyini bildirib. Yəni raketlərin Avropa və Ukraynada istehsal olunması üçün. Bu məlumatı nəşrə anonimlik şərti ilə danışan rəsmilər verib. Trampın özü də bu məsələ ilə bağlı açıq şəkildə qeyd edib.

"Onlar bunu etmək istəyirlər və biz bu məsələni nəzərdən keçirəcəyik", - deyə ABŞ lideri jurnalistlərə G7 sammiti planları ilə bağlı sualı cavablandırarkən bildirib.

Xatırladaq ki, sammitdən sonra G7 ölkələri və ABŞ Ukraynada yalnız hava hücumundan müdafiə sistemlərinin deyil, həm də uzaqmənzilli silahların istehsalına imkan verəcək lisenziyaların verilməsi barədə razılığa gəliblər.

Həmçinin Ukrayna Prezidenti Vladimir Zelenski 17 iyunda Brüsseldə NATO-nun Baş katibi Mark Rutte ilə görüşüb. Onlar Ukraynanın müdafiəsini gücləndirmək səylərini və ABŞ-dan hava hücumundan müdafiə raketlərinin istehsalı üçün lisenziyaların alınmasını müzakirə ediblər.

Qeyd etmək lazımdır ki, G7-dəki şəxsən görüşdən əlavə, Zelenski 17 iyun axşamı ABŞ Prezidenti Donald Tramp və Fransa Prezidenti Emmanuel Makronla telefon danışığı aparıb. Ukrayna liderinin sözlərinə görə, bu söhbətlər çox şeyi dəyişə bilər.