SON DƏQİQƏ: “Üçüncü dünya müharibəsi artıq BAŞLAYIB və ABŞ Çinə UDUZUR...”

Vaşinqtonun Rusiyanın Ukraynaya mümkün müdaxiləsindən narahat olmasına baxmayaraq, Çindən ehtiyat etmək lazımdır.
 
REPORTYOR.ORG xəbər verir ki, bunu keçmiş prezident Ronald Reyqanın oğlu, siyasi şərhçi Maykl Reyqan “Daily Freeman” qəzetində yazdığı məqalədə bildirib. Reyqanın sözlərinə görə, ABŞ artıq bir neçə onilliklərdir ki, Çinə qarşı üçüncü dünya müharibəsində iştirak edir və bu müharibədə uduzur.
 
İndi bütün dünyanın gözü Rusiyadadır və hamı Vladimir Putinin Ukraynada nə edəcəyini gözləyir. Siyasi şərhçi Maykl Reyqanın məqaləsində qeyd etdiyi kimi, adi amerikalılar Ukraynaya müdaxilənin olub-olmayacağını bilmirlər, bunu hətta prezident Co Baydenin administrasiyası da bilmir.
 
Moskva Ukrayna ilə sərhəddə təxminən 130 min əsgər yerləşdirib və buna cavab olaraq Vaşinqton Kremlə müdaxilənin qarşısını almaqda ciddi olduqlarını göstərmək üçün Şərqi Avropaya 3 min əsgər göndərdi. Beləliklə, Bayden “sərt” mövqe tutmağa çalışır.
 
Bununla belə, Reyqanın fikrincə, həqiqətən də cəsarətli və ağıllı lider Rusiya 72 saat ərzində qoşunlarını Ukrayna sərhədindən çıxarmayacağı təqdirdə onu 1980-ci illərdə olduğu kimi məhv etməklə hədələyərdi. Xüsusilə, Vaşinqton “Şimal axını” qaz kəmərini bağlaya və “Şimal axını-2”nin Rusiyadan Almaniyaya buraxılmasına mane ola bilər. Bundan əlavə, ABŞ “Keystone” boru kəmərini yenidən açaraq dünyanı ucuz enerji ilə təmin edə bilər.
 
Məqalə müəllifi hesab edir ki, Bayden keçən il “Şimal axını-2”nin tamamlanmasına “icazə verməklə” Putinə yaşıl işıq yandırıb və indi o, “Keystone”ni yenidən açmaqla səhvini düzəltməlidir.
 
Reyqan qeyd edir ki, ABŞ-da çoxları Rusiyanın hələ də ölkə üçün hərbi təhlükə yaratdığına inanır. Bununla belə, Rusiyanın ÜDM-i Kanadanınkından azdır və onun neft, təbii qaz və bəlkə də kürüdən başqa Qərbə lazım olan heç nəyi yoxdur.
 
Rusiyanın böyük və hətta kiçik müharibəyə xərcləməyə vəsaiti yoxdur, lakin Çinin var. Bundan əlavə, bütün ABŞ iqtisadiyyatı məhz Çin və onun zavodlarından təhlükəli dərəcədə asılıdır. Bütün növ “Apple” cihazları, “Nike” ayaqqabıları və “Black & Decker” alətləri ilə yanaşı, Baydenin hər bir amerikalının evinə göndərəcəyini vəd etdiyi koronavirus test dəstləri də Çindən gətirilir. Eyni zamanda Reyqan COVID-19-u da Çinin ixrac etdiyi ən təhlükəli məhsul adlandırır.
 
Hətta Hollivud belə baş verənlər qədər çılğın ssenari fikirləşə bilməzdi: Çindən təxminən 1 milyon amerikalının ölümünə səbəb olan ölümcül virus yayılır və sonra bu ölkə ABŞ-a amerikalıların virusa yoluxub-yoluxmadığını göstərən çoxlu test dəstləri satır.
 
Bu arada artıq 25 ildir ki, Asiya və bütün dünyada hərbi qüdrətini artıran və təsirini genişləndirən Rusiya deyil, məhz Çindir. Bu baxımdan Reyqan Rusiyanın hərəkətləri ilə bağlı narahatlığı mənasız adlandırır, halbuki buna həqiqətən də Çin layiqdir. “Üçüncü dünya müharibəsi bir neçə onilliklərdir ki, başlayıb. Və biz bunda Rusiyaya qarşı deyil, Çinə qarşı çıxış edirik və uduzuruq", - deyə Reyqan məqaləsində yazır. /Moderator.az