Buzlaqlar rekord sürətlə əriyir: 2 milyard insan ac-susuz qala bilər

Son altı ildir buzlaqlar rekord sürətlə əriyir. 2024-cü ildə dünya buzlaqları yenidən kütlə itirib.
Publika.az xəbər verir ki, bu barədə Ümumdünya Meteorologiya Təşkilatı (ÜMT) məlumat yayıb.
“2022-ci ildən 2024-cü ilədək tarixdə ən böyük buzlaq kütləsi itkisini müşahidə etdik”, – ÜMT-nin başçısı Seleste Saulo bildirib.
Xüsusilə Skandinaviya, Şpitsbergen arxipelaqı və Şimali Asiya buzlaqları zərər çəkib, burada itkilər rekord həddə çatıb.
Bildirilir ki, buzlaqlar buz qalxanları ilə birlikdə Yer kürəsindəki şirin suyun təxminən 70 %-ni saxlayır, dağlıq bölgələr isə planetin “su qüllələri” rolunu oynayır. Onların yox olması milyonlarla insanın su təchizatını təhlükə altına qoyacaq.
"The Guardian" isə UNESCO-nun hesabatına istinadən yazıb ki, dünyadakı suvarılan kənd təsərrüfatı torpaqlarının üçdə ikisinin iqlim böhranı səbəbindən dağlıq ərazilərdə buzlaqların əriməsi və qarın azalmasından zərər görəcəyi ehtimal edilir. Əriyən buzlaqlar dünya üzrə 2 milyard insanın qida və su təchizatında fasilələrə səbəb ola bilər.
"World Water Development Report 2025" hesabatında da qeyd edilib ki, 1 milyarddan çox insan dağlarda yaşayır və onların yarısı inkişaf etməkdə olan ölkələrdə artıq qida çatışmazlığı ilə üzləşir. Vəziyyət daha da pisləşə bilər. Çünki belə regionlarda qida məhsullarının istehsalı dağ sularından, qarın və buzlaqların əriməsindən asılıdır.