Demokratlar Təhsil Nazirliyinin ləğvinə qarşı kampaniyaya başladılar

Senator Elizabet Uorren ABŞ prezidenti Donald Trampın Təhsil Nazirliyini ləğv etməsinin qarşını almaq üçün “Məktəblərimizi Xilas edin” adlı kampaniyaya başladığını elan edib.

O, məqsədini “ABC News”a açıqlayıb:
“Federal hökumət bizim dövlət məktəblərimizə sərmayə qoyub. Bunu bir neçə milyarderin daha da varlana bilməsi üçün uşaqlarımızdan almaq, sadəcə dəhşətdir və mən buna qarşı əlimdə olan hər şeylə mübarizə aparacağam”.

Qanunvericinin sözlərinə görə, onun strategiyası təhsil sistemində islahatların aparılması adı altında nazirliyin ləğvi probleminə mümkün qədər çox insanın diqqətini cəlb etməkdir. Bu məqsədə çatmaq üçün o, həmçinin federal araşdırmalara başlamaq və məhkəmə iddiaları qaldırmaq niyyətindədir.

Xatırladaq ki, martın 20-də Tramp Təhsil Nazirliyinin ləğvinə başlamaq üçün sərəncam imzalayıb. Onun sözlərinə görə, “Birləşmiş Ştatlar təhsilə hər hansı digər ölkə ilə müqayisədə daha çox pul xərcləsə də, uğur baxımından siyahıda sonuncu yerdədir”.

Qeyd edək ki, 1979-cu ildə ABŞ Konqresi tərəfindən yaradılmış nazirlik dövlət məktəbləri üçün federal maliyyələşdirməyə nəzarət edir, tələbə kreditlərini idarə edir və aşağı gəlirli kollec tələbələrinə kömək etmək üçün proqramlar həyata keçirir. Tramp və Respublikaçılar nazirliyi “gənclərə irqi, cinsi və siyasi cəhətdən uyğun olmayan materialları təbliğ etməkdə” ittiham ediblər.

Tramp administrasiyasının nazirliyi ləğv etməsi yolunda ciddi maneələr var.

Belə ki, Konqres Təhsil Nazirliyini tamamilə bağlamaq üçün qanun layihəsini təsdiqləməlidir. Layihənin hüquqi qüvvə alması üçün Senatda qəbul edilməlidir. Burada yuxarı palataya nəzarət edən respublikaçılar ən azı 7 demokratın dəstəyini almalıdırlar, bu da çətin ki, mümkün olsun.