Bill Klinton: “Məlumatım olsaydı, nəinki Epşteynin təyyarəsində uçmazdım...”

ABŞ-nin keçmiş prezidenti Bill Klinton Nümayəndələr Palatasının nəzarət komitəsinin dinləməsində maliyyəçi Ceffri Epşteynin cinayətləri ilə hər hansı əlaqəsini təkzib edib.

Reportyor.tv xarici mediaya istinadla xəbər verir ki, çıxışında o, Epşteynlə əlaqələrinin onun cinayətkar fəaliyyətləri məlum olmazdan çox əvvəl dayandırıldığını açıqlayıb.

"Mən heç nə görməmişəm və heç bir səhv etməmişəm. Mən zorakılıq halları olan ailədə böyümüş biri kimi, onun fəaliyyətləri haqqında ən kiçik bir məlumatım olsaydı, nəinki onun təyyarəsində uçmazdım, həm də onu özüm hakimiyyət orqanlarına təhvil verərdim", - deyə Klinton sərt şəkildə bildirib.

O, həmçinin həyat yoldaşı Hillari Klintonun ifadə vermək üçün komitəyə çağrılmasına etiraz edib və bildirib ki, xanımı heç zaman Epşteynin obyektlərində olmayıb.

Daha əvvəl milyarder Ceffri Epşteynə dair dərc olunmuş sənədlərdə ABŞ prezidenti Donald Trampa qarşı iddialar irəli sürən qadınla müsahibə də daxil olmaqla təxminən 100 əsas sənədin olmadığı bildirilmişdi. CNN-in araşdırmasına görə, Ədliyyə Nazirliyi tərəfindən dərc olunmuş iş sənədlərində 90-dan çox ifadə yoxdur.

Musavat.com